Post Position

Post Position/Uasam

Chwng jephuru kok sao aphuru kwbangma kokthairog thepawi sajago eba samungo thepajago. Abohai kokthairogni logio nangmani sinimari thepawi kokbwtang swnamjago. 

Phunukmari : Norogni, Nogo, Chwngno. O kokthairogo ni, o, no sinimarirog nukjago, obohainono sinimari hinjago.

Kokthaini logio kwbangma sinimari thepawi je kwtal kwtal kokthai swnamna bagwi main word/thaichwlwi tei Verb/ kokchwlwini logio Uasa tei Uakhwlai thepajago. Kok hinkhe kwtal kokthai swnamphuru chwng je Uasa tei Uakhwlaino thaichwlwi tei kokchwlwini logio thepamani ulo kokthai thansa wngwi taisa kwtal kokthai rio eba kwtal kokthaini mang rio. Muitu narak thai Sinimari, Uasa tei Uakhwlai saichung sak kaisa sakmang gwnang wngwi manya, tamoni hinkhe borogni judakhe  kunu kokmang kwrwi.

Kokbwtango chwng omohai kwbangma jatrepod kokthairog samungo phwnango je kokthairog Mung, Mungswlai kokbakni ulo eba kokbankni ganao achugwi kokbwtango phwnangjak kokbakrogni bisingo kaisa halok kwrwng rio, tei o kokthairog sak saichungbo kokmang gwnang wngwi mano. Obohai kokthairognono Uasam eba Post Position hino. 

O koknobo muitu narakthai Kokborok kogo chwng je sinimari hwnwi chongmani eba  chwng je sinimari hwnwi sinimani abo joto sinimariya, aborogni bisingo Post Position eba Uasam kokthairogbo tongo. Sinimari tei Uasamni bisingo pherlaimung wngkha-  Sinimari hinkhe kokmang kwrwi tei sak saichung kokmang gwnang wngwi bachai manya, phiya Post Position eba Uasam hinkhe sak saichungno kokmang gwnang wngwi bachai mano.

Note: Sinimari hinkhe kokthaini logio thepajagwi thansa wngwi kokmang rio, Uasam hinkhe Kokthaibai thepajakyawi kokthaini samo achugwi sak saichung kokmang gwnang wngwi mano. 

Hinkhe Uasam eba Post positionno rwgwi chwng obono saimano,  Mung (Noun), Mungswlai (Pronoun) kokthaini ganao achugwi kokbwtangni juda juda kokbakrogni bising halok bokhe tei kokbwtango sak saichung baithangni kokmang kwmayatwikhe tongmanai kokthainono Uasam eba Post Position hino.

⇵                              ⇵                          ⇵                          ⇵

Oro ang tai kaisa kok sana muchungo abo wngkha sakani o definationno kahamkhe naidi tei khamao rijak phunukmarino naiwi defination bai gothok riwi naidi. 

Kokborokni Post position eba Uasamrog wngkha - 


Kokborok                       Bengali         
        
bai                                    সঙ্গে/দিয়ে                      
phaising                          দিক                               
bwkhak                           দিক/অংশ                 
hai/kahai                        মতো                             
bero                                 মধ্যে/মাঝে 
thani                                কাছে/নিকটে
ulo                                    পরে
kwcharo                          মাঝে/মাঝারে/মধ্যে 
logi                                   সঙ্গে 
bisingo                             ভিতরে 
sakao                               উপরে 
samo                                পাশে
ganao                               পাশে
tolao                                 নিচে 
bagwi                               জন্য 
yasa                                  ছাড়া/বিনা

Sakani o Post position eba Uasamni phunukmarino twiwi bahaikhe kokbwtango sajagwi tong eba bahaikhe kokbwtango achukriwi sajagwi tong abono khamao swiwi phunukjaganw-

1. bai   - Ang bai himdi.

2. bai   - Chekhwra bai radi.

3. phaising   - Biyang phaising thangnai

4. hai   - Bo hai kaham oro kwrwi.

5. thani   - Nini thani tamo tong?

6. logi   - Bini logi sabo thangnai?

7. ganao   - Bini ganao achukdi.

8. yasa   - Bo yasa wngwlak.

Sakani o phunukmarino naiwi naikhe nugo post positionni kokthairog sak saichungno kokbwtang sajak phuru eba swijak phuru kokmang gwnang wngwi bachao. Obonono chwng post position eba Uasam hino.


Follow khaidi⬇️