JORA/TENSE

JORA - TENSE

Khwlai tumung mungsaswk wngma jorano sakhe abono hino Jora eba Tense.

Kubuni kok hai kokborok kogo bo Jorano Kaithamkhe khagwi mano.

1. Wngtong Jora

2. Wngthang Jora

3. Wngnai Jora

*WNG TONG JORA

Khwlaini samung tabuk wngmani eba wngwi tongmani kokno sajakhe aboni jorano hino Wng Tong Jora.

Phunukmari : 

a) Bilash bol thwngo.

b) Chwng twi nwngwi tongo.

c) Bo bisi brum brum kharchi mwtaio thango.

d) Hamari aichugo bachao.

e) Sampili mai chawi tongo.

Sakani o phunukmarirogno naiwi naikhe nugo khwlaini samung baksa tabukno wngwi tong tei homdino wngwi tongo eba সব সময় wngwi tongmani kokno sajakhe abono chwng Wngtong Jora hino. Kok hinkhe, jephuru mungsaswk samung homdino jorao wngwi tongo eba tabukno wngwi tongo amohai bujirikhe abono chwng Wngtong Jora hwnwi saimano.

WNGTONG JORA-no dalnwikhe khakjago, aborog wngkha-

I) Kalni Wngtong Jora (Simple Present Tense)

II) Wngwi tong Jora (Present Continuous Tense)

Kalni Wngtong Jora/ Simple Present Tense

khwlaini samung sal brum brum wngmano hino Kalni Wngtong Jora.

Phunukmari : 

a) Kwthar rwngnogo thango

b) Nokhao tal kao

c) salkabai sal kao

O phunukmarino naiwi naikhe saimano khwlaini samung homdino wngnai hayungni raida rwgwi eba tabukno wngwi tongo abohai joranono  Kalni Wngtong Jora hino.

Wngwi Tong Jora/  Present Continuous Tense

Khwlaini Samung tabukbo wngwi tongo eba paisukyakho abotwi sajakhe abono hino Wngwi Tong Jora.

Phunukmari :

a) Chwng Cricket thwnglai tongo.

b) Kormoti mwsai tongo.

c) Ama mai mui songwi tongo.

d) Bo mai chai tongo.

e) Aichuk kamio thang tong.

Sakani o phunukmarirogno naiwi naikhe khwlaini samung wngwi tongo tabukbo paisukyakho eba paisugwi thangsukyakho, abohainono Wngwi Tong Jora hinjago.

*WNGTHANG JORA

Khwlaini samung swkangono wngwi thangma kokno sajakhe abono hino Wngthang Jora.

Phunukmari :

a) Borog mai chajak.

b) Bo miyano poriwi paikha.

c) Chwng o thwngmung thwnglaikha.

d) Kubui bijap kangsa paikha.

Sakani o phumukmungrogno naiwi naikhe khwlaini o samungrog swkangono wngwi paijak. Kok hinkhe je samung khwlaimani a samung swkangono laiwi thangkha abohainono Wngthang Jora hinjago.

WNGTHANG JORA-no dalnwi khe khahwi mano-

         I) Kalni Wngthang Jora (Simple Past Tense)

        II) Wngwi Thang Jora (Past Continuous Tense)

Kalni Wngthang Jora (Simple Past Tense)

Khwlaini samung swkangono wngwi paimani kokno sajakhe abono hino Kalni Wngthang Jora.

Phunukmari: 

a) Rabon Sitano khokkha.

b) Achu mai chakha.

c) Kumui hugo thangkha.

d) Hamari habanogo thangkha.

O phunukmarino naiwi naikhe khwlaini o samungrog swkangono wngwi paikha. Abohainono Simple Past Tense eba Kalni Wngthang Jora hinjago.

Wngwi Thang Jora ( Past Continuous Tense)

Khwlaini samung swkangono wngwi tongmani kokno sajakhe abono hino Past Continuous Tense eba Wngwi Thang Jora.

Phunukmari:

a) Bo aphuru mai chai tongo.

b) Khachukti aphuru twi khogwi tongo.

c) Ang poriwi tongmani.

Sakani o phumukmungrogno naiwi naikhe khwlaini o samungrog swkangono laiwi thangkha, phiya paiyakhu. Abohai sajakhe abonono Wngwi Thang Jora eba Past Continuous Tense hino. 

*WNGNAI JORA

Khwlaini samung thinango tangjaknai eba tangjagwi tongnai abotwi sajakhe abono hino Wngnai Jora.

Phunukmari:

a) Ang mai chanai

b) Bo Agartala thangwi tongo.

c) Chwng khwna Udaipuro thanglaiyanw.

d) Kuphuti khwna kiphilnai.

WNGNAI JORA-no dalnwikhe khagwi mano-

         I) Kalni Wngnai Jora (Simple Future Tense)

        II) Wngwi Tongnai Jora (Future Continuous Tense)

Kalni Wngnai Jora (Simple Future Tense)

Khwlaini samung thinango tangjaknai hwnwi  sajakhe abono Kalni Wngnai Jora hino.

Phunukmari :

a) Chimlang khwna rwchapnai.

b) Dumpa khwna rwngnogo thanganw.

c) Chwng bol thwnglainai.

Sakani o phumukmungrogno naiwi naikhe khwlaini o samungrog ulo wngnai eba tabuk phano wngyakhu, abohai sajakhe bonono Simple Future Tense eba Kalni Wngnai Jora hinjago. 

Wngwi Tongnai Jora (Future Continuous Tense)

Khwlaini samung thinango tangjagwi tongnai hwnwi sajakhe abono Wngwi Tongnai Jora hinjago.

Phunukmari :

a) Ang bijap poriwi tongnai.

b) Ama maimui songwi tonganw.

c) Bo thangwi tongsoknai.

d) Chwng sarigo TV nailai tongnai.

Sakani o phunukmario khwlaini samung kaisa phano wngyakhu, phiya khwlaini o samung thinango eba ulo wngwi tongnai eba wngnai. Abohainono Future Continuous Tense hino.


Subscrib 

Follow khaidi⬇️