Dongoino Ringdi

Koklop wngkha kaisa kuthuk wansukmung, kisa kokni bisingtwi kwbangma kok sanani naio. Khoroksa swinai kuthuk wansukmung tei kuthuk kothaini bisingtwi koklop swio eba phunukna naio. Koklop bisingo kaisa kokmang huijak tongo, kaisa kok kwcharmung tongo. Abohainono koklop hino.

Dongoino Ringdi koklop bo obohaino oro Khumpui kerang kothomano rwgwi sajago, phiya tamo sana nai abono chwng tabuk nailaiyanw. Khumpui kerang kothomano muitu khwlaiwi.

Dongoino Ringdi

Bongshi Thakur

Dongoiwi dongoi hwnwi ringdi,

Bibi kankha bwkhwrwi,

Hanok kankha babwrai,

Totwra jora twi lomkha

Taile lerliya.

Dongoile kisa nasingwradi. 

Koklop Swikwrwng Bongshi Thakur bai swijak "Dongoino Ringdi" koklop  1983 bisio puila 'Kokborok koklop bwchap' bijabo sapogwi karijago. O koklop "Khumpui Baruru" kerang kothomano rwgwi swijak. Swinai bini o koklopni bisingtwi Dongoima Dongoipha jorani simi khuk bai khugo sajagwi phaimani Khumpui kerang kothomano rwgwi bo bini o koklopbo khursawi sanani naikha. O koklobo swinai sanani naimakhe   Khumpui kerang kothomao Raima bai Saima huk tanglaiphuru lenglana bagwi khungsa gairing kwrwini bagwi watwi satung manjagwi belai kotor birman jwngjalo kwlaima haikhe agini simi tabuk jora tabukbo khorok bomdorop tongthai tei baithangni bagwi manthai sokthai manani hinkhe tabukbo khuk khorang tisawi chirikhogwi sakni manthaino sanwi ma  tonglaijao tong kosong tong kesebo  tongwi tongnai borokrog. Aboni bagwino o koklobo sajago - "Omorani koktang omo/I rwchapmung thakliya" hwnwi. Omorani hinmanino wngkha paiphwlaiya. Kok hinkhe  Raima bai Saima Gairing khungsani bagwi kwthar swmai tangma haikhe tabukbo tong kosong tongnai borok dophani borokrog baithangni manthaino tabukbo chirikhogwi khorang kichigwi santhai sanwi ma tonglaikho,  "I rwchapmung thakliya" hinmani bisingtwi obonono sanani naio agini simi  wngwi phaimani tabukno wngwino tongnai, khuk bai khugo Raima bai Saimani rwchapmung kochogwi tongma hai tei kwmaliya manthaini bagwi muktwi kuplung chirikhokjak khorang.

Dongoiwi dongoi hwnwi ringdi. 

Omorani koktang omo

I rwchapmung thakliya.

Dongoile kisa nasingwradi.

Dongoiwi dongoi hwnwi ringdi.

Swinai bini o koklobo kusungre kusung bisi romwi kubui wngmani wngwi phaijak kwcham kothomani kokrogno eba wngmarirogno khursawi sanani naikha thakphwlaiya mari bai. Tamoni hinba Dongoima Dongoiphani jorani simi khatijak kwbangma manthai manliya. Aboni bagwino Gairing khungsa mannani  bagwi Raima bai Saima swmai ma tangma hai tabukbo manthai sokthaini bagwi babaisa bwkhak khorang kasai tongo.

O hayung kotormao hamangni goron bwswkse naithok, naibo naibaya bolaibo bolai baiya. Abo haino khani borokno Dongoi hwnwi lobwi ringwi ringwibo  khani kokthai paya, khorang paya phano khabai ringna muchungo. Jora kebono nasingwi tongya, achaimani simi thwiyasak jora khajak. Haiphano langma tongsak tongsugwi thangnani bagwi logisongbo nango, abo haino manthai, tongthairogbo nango. Wngyakhe twrwk twrwk twrwk totwra jora twi lomwi phainai, twrwk twrwk kochogwi thangnai, twrwk twrwk teibo kuthuk besero sepjagwi kwlwknai.   

Swimungni paithago kok kisa bai sana thangkhe sana kwlaio, chini ha ama tongwi tongwise tobo khuk thakya khwlai manthai sanani nango. Ani nini hwnlaiwi mwkhang khorang somlaiwi ma tonglaio. Koklopnai Amarendra Debbarma(Bongshi Thakur) bini o koklobo luku boosngni boroknono yasi surwi sao jora kolok romwi rwngmarini phan kwmayatwikhe samung khwlaina bagwi.   Bo teibo sanani naikha khani borokno naibo naibaiya hai, lobo lobaya hai, khuk thakya ringbo khuk ruwaiya hai chwng ha amani khurio achugwi manyasak bwthakyawi thansa khe samung ma tangnai. Haiyasak thangsagwlak chini luku bosong. Khoroksaya khoroksale Raima haikhe khorang ma tisanai  manthaini bagwi, aboni bagwino Dongoino Rindi hwnwi o koklobo sajago.

___________________________________________

Suggestions 👇

Q.1.    "Omorani koktang omo

          I rwchapmung thakliya"- O kokbwtang boroni naharjakha? Swinai sabo? Koklopnai o kokbwtangni bisingtwi tamo sana naikha sukurubwi swidi?

Q.2. 'Dongoino Ringdi' koklopni kokyaphang eba kokbokhiri swidi?

Q.3. Bongshi Thakurni sinimung tei swimung swidi?

Q.4. Dongoi sabono hinjak?

Q.5. Khumpui kerang kothomano bathongkhe saidi?

Q.6. 'Dongoino Ringdi' koklop swidi?



Click Here For Download PDF

Follow khaidi⬇️