Brief Summary of Kokborok thungnuk

Khukmoson/Introduction

Hayung kotormao tongnai bebak borokrognino juda juda kok tei juda juda Kokrwbai tongo. Phiyaba kok tongkhe Kokrwbaibo tongo. Kokno kitingwino Kokrwbai torwi logwi phaio. Kokni bisingtwino Kokrwbai tongmani saimano eba mari nukjago. Kokrwbai wngkha kha bisingni wansukma tei muchungmano kholwi khwnathokhe samani. Kokrwbaino dalnwikhe khagwi mano. Dalsakhe khukni Kokrwbai, tei dalsakhe swijak Kokrwbai. Khukni Kokrwbai wngkha sirisitini simi dongaima tei dongaiphani jorani simi khukbai khugo sawi phaimani Jaduni rwchapmung, Kokbokhri, Kerang kothomarog. Swijak Kokrwbai wngkha kaisa bumul rikjakno hino tei chwng abono mokolbai nugo tei khukbaibo poriwi manmani Koklop, Kothoma bwsa, Kokbwkhal, Kothomayung tei thungnuk akorog. Hayungni kwcham thungnuk laibumano rwgwi naikhe Greek, Bharat hakotorogni mung kasawi phaimani nukjago. Jisu khristo achaimani bisi rasa swkangni simino Greek theatre songchajakha. Greekni mwtai kotor 'Dionysian' hwnwi. A mwtaino surima rwgwino puila Thungnuk chengsajago hwnwi chwng saimano. Greek theatreni ulo Ruman theatre tei France theatre achaikha aboni ulo kwcham Bharatiyo bo Bharatmuni swimani pancham veda “Natya shastra"ni bisingtwi twrwk twrwk thungnuk chengsajakmani nukjakha. 

Thungnuk tamono hwn? (What is Drama) 

Mungsaswkni kosolkhe phunukmanino wngkha Thungnuk. Thungnukno Ingarji kokbai hino 'Drama'. Drama kokthai naharjakha kwcham Greek kokthai 'Dram' ni, Dramni kokmang wngkha 'Khwlaimung'(to do/to act). Thungnuk wngkha kaisa kha bisingo chopjak tongmani kokno twiwi luku hodani tongmung-chamung, hukumu-mukumu,rwchapmung-mwsamung,tongthok-chathok, walai-suklai hamjakmung-naislemung aborogno thansakhe dadak-sidak hayao mangpilini bisingtwi phunugwi rio. Thungnukno hodani aina bo hwnwi sajago, tamoni hinkhe o thungnukni bisingtwino hodani joto tongmung chamungno phunugwi rijago.

Kokborok thungnukni laibuma (History of Kokborok drama)

Kokborok thungnukni laibumano rwksawi naikhe saimano Tripura hasteo wanjwi dopharogni thungnukno mwsamani bisingtwino twrwk twrwk Kokborok thungnukbo mwsanani chengjago. Tripurao puila wanjwi kokbai swijakmani bagwi Bubagwrarogbo kok wanjwini kokrwbaio belaino kha rwmani nukjakha. Jora kaisao wanjwi kokno Bubagrarogni kok hwnwibo gosiwi naharjakha. Aphuru wanjwirogni kwbangma thungnuk mwsama nuguino Kokborok sanairogni khaobo thungnuk swinani muchungma phaijakha. Abohaikheno kokborokbai swijak puila Thungnuk nukjakma wngkha 'Jonosikha Somiti' achaima jora 1948 bisio kokborokni rwbaiphang Sudhanwa Debbarma bai swijak "Egiye Cholo" thungnuk .O thungnuk kok wanjwi tei kokbrokbai dalogwi swijakha abono Ingreji kokbai 'Billingual Drama' bo hinjago, tei omono puila Kokborok thungnuk hwnwibo tabuk jora sajagwi tongo. Aboni ulo 'Parikhit Bidruho' mungwi teikaisa thungnukbo swijakha, phiya o thungnukni swimungrog manliya. Aboni uło 1973 bisio Alindralal Tripura bai “Langmani Homchang" mungwi thungnuk swiwi karijakha tei o thungnukno October talni 11" salmario Rabindra Bhavano mwsawibo phunukjakha. O thungnukno Kokborokni puila proscenium Theatre hwnwibo sinijago.

Tripura hasteo ulo twrwk twrwk teibo thungnuk swithani yakpai nukjakha Swikwrwng Shyamlal Debbarma bai swijak "Bengswnal-1(1973), "Bengswnal-2"(1974) bisio sapogwi karijakha.Aboni ulo 1974 bisio Jagatbasi Jamatia bai swijak 'Kolijug', 1975 bisio Shubudlal Jamatia bai swijak 'Thwiphota'. Aboni ulo haino hai chini Tripura hasteni swikwrwng Nanda kumar Debbarma bai bebagwi kaibrwichitham (43) Thungnuk swikha hwnwi laibumao sajago, a thungnukrogni mung wngkha- 'Bubar'(1970), 'Mukumu'(1974), Kok kisa koktang hai'(1984), 'Mari'(1985), Randijwkma'(1986),'Imangni Bwsarog'(2015), 'KhoroksaSwkal'(2015), 'Isiri Hiraboti'(2015), 'Sikhok' tei 'Bolongni Muktwrwi' akorog. Omoni ulo Modusudhan Debbarmabo haino thungnuk swikha- Chamari Ompa', 'Kwkhwrang Siyal', 'Eklobya' tei "Chethuwang' akorog. Thungnuk swikwrwng hwnwi tei khoroksa munggwnang wngkha Ruhi Debbarma. Bini thungnukrogni mung wngkha- 'Khumpui', 'Kuchuk kherengbar','Kuchuk Ha Sikam', 'Buini Hambara Baithang Dogwra' tei "Swkal' akorog. 

Kokborok thungnuk swinairogni bisingo tei khoroksa swikwrwng wngkha Narendra Debbarma. Bini bebagwi kaichichar(18) thungnuk swijakha. Bini swijak thungnukrogni mung wngkha- 'Khasiya'(1977), 'Nobar Domsani Kothoma'(1983), "Luku Hamari Hoda'(1983),'Mirik'(19),"Thapwlani Sindur'(1984), 'Imangni Biphiring Kobono'(1986), Wngna Takiridi Motwi'(1986), 'Aitorma'(1986), Paithakni Koktun'(1986), 'Sabsutra Raja'(1986), 'Mwnakni Chati'(1987), "Wansogwi Yapiri Sedi'(1987), 'Siyari Pamtwi'(1989), 'Achaima Ha'(1992), Butowasani Kothoma'(1996), 'Uphil Nahardi Kisa'(2002), 'Swkal Sabo'(2005), "Rwngmari'(2012). Abono karwi koklop swikwrwng hwnwi sinijaknai munggwnang Chandra Kanta Murasinghbo haino 'Ha Rimi' mungwi thungnuk swikha. Aboni ulo munggwnang Braja Kishore Dibakar Debbarma, Galem Debbarma tei Sonacharan Debbarma akosongbo Thungnuk swilangkha. Munggwnang Rabindra Kishore Debbarmabo haino thungnuk swithani yak rwmabai Udaipurni Tipra Sundari Amano achukrimani bisi rasa pungmano rwgwi Thungnuk thaisa swijakha. Tabukni jorao thungnuk swimungo yak rwnai kwtal khoroksa wngkha Rabindra Debbarma. Bo tabuksakjora kaibrwi(4) Thungnuk swikha.Bini swimani thungnukrogni mung wngkha- 'Ang Thangna Swkang'(2014), 'Majwra Saboni'(2015), 'Manjakthai'(2016), 'Bwthai Thaikhe Bedek Kongo'(2017) akorog.

Oborogno karwibo teibo thungnuk swijak tongo, abono twiwi next o salainai.

  Follow khaidi ⬇️