Aming (Kokbwkhal)
Swikwrwng Bankim Chandra Chottopadhay bai swiwi tikhwlaijak "Kamlakanta Doptor" kokbwkhal bijapni "Aming" kokbwkhalno kokphilwi kokborok kokbai swikha boromgwnang Nagendra Chandra Debbarma (1992).
O Aming kokbwkhalno cherwi naikhe swinai Bankim Chandra Chottopadhay kamlakantani bisingtwi juda juda tongmarini kokno phunukna naio tei ok khuima, chana muchungma, manthai tei sokthaini kokno malmatani bisingtwi phunuknani naio biyalo kwrwi hayungni borokrogno. Tei ma chaya, ma nwngya hinkhe ok khuinai borokrog tamo khai tei tamo wngna nang aborogni kokno swinai Aming kokbwkhalni bisingtwi phunuknani naikha eba sanani naikha.
Kokbwkhalni kothomao chwng nukha kamlakanta hwnwi khoroksano prasanno mungwi khoroksa dut kwlangmanino aming masa phaiwi nwngwi paio tei aming kamlakantani dut nwngba bagwi Kamlakanta bono buna bagwi latha kongsa khochawi riphirigo, aphuruno eba joraono 'miyong' hwnwi pungma khorang khwnawi Kamlakanta ok khuijak amingni bwkhani kokno khwnama hai wngjago tei bini birimanni kokno bujiwi mano. Kamlakantani wansukmungni gwrwng kaham wngwino amingni bwkhani kokno khwnawi mankha. Kok wngkha swinai bini wansukmungni bisingtwi obohai ok khuijak amingni goronni bisingtwi borokni kokno ma chaya ma nwngyani kokno sanani tei phunuknani naio.
Kamlakanta jephuru dut nwngo hwnwi amingno buna bagwi riphirigo aphuru aming bono chajakya wngwi sao -- "Bulai toklai tamoni? Swngcharo khir, dut, doi, A muirog chanai chini bagwikhe kustam kwrwi? Norogni bohok ok khuimung tongu, chini khai kwrwi?" hwnwi. Ma chaya ok khuijak boro kisa phano chana manno hwnwi chamung rutukjak Aming bai Kamlakanta teibo sajago- "Ok khuima hamrina bagwi o hayungni jotono lam ma naitugo. Norogbo chwng ahai machaya salnwi salthamswk tongwi naila, aphuru norog bahai ma tong?" hwnwi. Sana naimakhe aming hai ok khuijak borok o swngcharo kwbangma tongo biyal bigwrani bagwi chana nwngna kwrwi, kanna chumna ri kwrwi wngwi kisa misa aming dut khogwi chama haino obohai kwrwi bigwra khagwra borokrogbo kisa misa okni bagwi khogwi chana nango, obohai bigwra borokrog khokna hwnwi khokya, borogbo kaisa bohok tongmabai hai wngna nango.
O Aming kokbwkhalo kha khamjak aming masani khuktwi khoroksa borok Kamlakanta kaham hamya kok khwnakha tei khwnanani nangkha, gwnangrog chamani bara rang ri, chamung nwngmung tongwise machaya borokrogno bagwi chariya obohai kokrognono swinai bini o kokbwkhal kothomani bisingtwi sanani naio. Oro sana naimankhe kebo borok kwrwi bigwra ma chaya ma nwngya keboni oro chamung khogwi haino ereng ereng chaya, ma chaya ok khuijak wngwino chao, obohai koknono Bankim Chandra Chottopadhay bini kuthuk wansukmungni bisingtwi mangpili tisawi phunuknani naio.
O kokbwkhalo aming kaisa kok samani tongo -
"Naidi ang prachin sakao miyong pungwi beraio, kebo ano A busu jora khitarwi riya. A busu mairangni mai hanta twi hamya khibiwi rio, tobo ano ringwi chariya" hwnwi.
Oro sanani naimakhe baksa baksa borokrog chamani barano khibiwi rio tobo ok khuijak kwrwi bigwra borokrogno nuhunwi chariya hinmani kok. Obohai chamung bara gwnang khurumpui nokni borokrogni bagwi hamya wngwi mano phiyba a chajak barano kwrwirogno bagwi khe kaham. Kaham charidi kaham kharidi hwnya, obohai bigwra ok khuijak borokrogbo chamani hamya barano simi phanose charidi hwnwi khairoksusu khe sanjao. Phiyaba rina soiya, charina soiya, aboni bagwino khogwi hano ma chao hwnwi Kamlakantano Aming bini bwkhani kokno, bini bigwra kwpalni kokno khulugwi sawi khwnario.
Aming bini kokno thakphwlaiya khe Kamlakantano khwnario- "Sirumoni tei Neilokar phaiwi dut cha phaiphurukhe nwng bono bunani da riphirik khamun? Yak chabwi khulumwi teibo chadi hwnwise sakhamu. Ani banta khe tangwi latha" hwnwi aming bini khani kokno sawi khwnario hayungni borokrogni thanio. Tamoni hinmale borokrogni khao wansukmung hamya tongmarogno kha sitwra tongmarogno aming masani bwkhaktwi phunukjakha. Oro sirumoni tei Neilokar hwnwi khursajakmani bisingtwi sanani naimakhe gwnangrog phaiwi chaphaikhe teibo charikhamu manna bagwi, nangphuru chubajakna bagwi. Kwrwirogno rikhe, charikhe chubajakgwlak, mungsa mangwlak obohai koknono oro sanani naijakha.
Gwnangrogkhe chabaiya nwngbaya, amingrogkhe bohok lapsakhe bekereng luhu luhukhe khitung bomjak, buwa phataro nongkhorjak, bwslai phataro lokhwlaijak. Ok khuiwi miyong miyong. Bigwrarogkhe khogwi chakhe chaya wngo gwnangrogkhe wngyada hwnwi Kamlakantano sawi khwnario. Kok hinkhe ma chaya ma nwngya wngwi kwrwirogni goron eba sakmangni gwrwng bahai wngwi tong o kokbwkhalni bisingtwi sanani eba phunuknani chaitokjakha swikwrwngbai.
Kamlakanta bai amingni bisingo kwbangmano kok wnglaikha deshni hamarini kokrog, phiya aming chajakya wngwi sakha 'Angse ma chaya hinkhe desho hamari phaiwi tamo khwlainai?' Kok hinkhe ma chaya ma nwngyabai hamari wngwi manya a kokno aming sanani naio. Aming teibo sao sikhokno bwtharwi khibidi dwkhwibai rabwi khadi ang mungsa wngjakya, phiya je borok sokhokno saja rina swkang salnwi salthamswk mai chayawi tongwi naidi, aphuru Nashibabuni ganti nogo sokhok manjakya hinkhe ang kokthaisa sagwlak' hwnwi Kamlakantani bwkhaktwi borokrogno o kok sanani naikha bwkhani naselemung, hamya wansukmung khibinani bagwi.
hambai sir
ReplyDeleteLamsogo
Delete