NASINGMA KOKLOP

Koklopnai swikwrwng Kumud Ranjan Debbarma bini 'Nasingma' koklopni bisingtwi sana naimakhe bosong bai bosong eba borok bai borok walaya suklaya khwlaiwi tongkwchang tongmarini bisingtwi kwrwi gwnang bigwra khagwra hinyawi kaisa tai kaisano nisura khwlaiyawi kha riwi chubalainani tei sandai bai sandai kha baksa khwlaiwi  kha kaham khe tongnani kokno sakha. Kok hinkhe swinai obohai sal kahamni salnono nasingwi tongo hwnwino bo bini koklobo sao - 

"O sal buphuru phaino hwnwi 

Ang nasingwi tongkha

Jephuru nwng ang hwnlaiyawi

Nini ani hwnwi walaiyawi

Tongmung sitra tongmarog

 Tei tongwlakha

Bebakno chini wansugwi 

Tonglainai kha kwbagwi

wngwi thansa wansukma

Thansa sakduk bwkha"

Koklopnai o kokbwtangni bisingtwi sana naimakhe jephuru borokgrog sakno torjakyawi nini ani hinlaiyawi naiselema, selengma kwrwikhe jotonono baithangni hwnwi kha chonglaiyanw tei kwlwkjak kwrwi bigra khagwrarogno kuchuk beremni borokrog jephuru kha kuwarkhe kha riwi chubawanw tei sandai swnamanw, kha kwlwibai khoroksa tei khoroksano yachaklaiyanw, chubalaiyanw abo hai salnono swinai nasingwi tongjao hwnwi chwng bini o koklopno poriwi naiwi saimano. 

Swikwrwng oro thansa wngnani koknobo sao. Swinaini wngwi thansa wngkha je borokni naharmung tei naimung thansa, abonose thansa hino. Bosong hamkhwlai khainani hinkhe chwng kha kaisa, phan kaisa wngwi chini naharmung tei naimung baksa wngkhaise thinangni samung bwtangno bwskango teibo kahamkhe chariwi tisawi twlang mannai.

“Jaitiduk songduk mung

Hani komolwi thangnai.”

O kokbwtangni bisingtwi swinai sanani naimakhe - 'Jatiduk songduk' hinmani bisingtwi oro kwlwkjak luku bosongni borokrogno yasi surwi sajakha. Tamoni hinba songduk hwnwi sinijakmani abo wngkha jotoni swlai tola kwlaijak bosong. Swinai abonono sanani naio kwlwkjak bosongno kuchugo tisawi songduk sinimungni yak kakrinani, aboni bagwi chwng jotono khoroksa tei khoroksa thansa wngwi samung ma khwlainai eba samung ma khwlaithai. Thansa wngna hinkhe nasikmung, wansukmung kaham wngna nangnai tei  walai suklairogno norwi tongmari kahambai jephuru tong kwchangkhe tonglaiyanw aphuruse swinaini koklop swimungni kokmang bumul wngwi mannai. 

“Khetni ail deshni ari 

Swbai kaisa wngnai”

Koklopnai Kumud Ranjan Debbarma bini o koklobo arini kokno tisawi sakha, tamoni hinba chwng kuchuk kotor bosong wngwi bachanani hinkhe kha hamya khabai kuchugo kasawi manya tei kha kahamni bisingtwi kha bai kha ari bowi wansukmung kwtal swnamma haikheno ha ari phatarni borokrogno thansa hwnwi wansugwi nanani kokno sajakha.

“Kebo kebono satogwlak

Tei bugwlak togwlak,

Tei elegana khwlaigwlak

Naiselegwlak tai.”

Khoroksa tei khoroksano satok pitok khwlailai gwlakha tei elegana khwlaigwlakha hinmani bisingtwi swinai kaham tongmari bai twi dolwi hamya tongmungrogno mechenwi mano hwnwi sanani naio, tamoni hinkhe khoroksa bosong kotorni borok wngwi bosong chikonni borokrogno ari bowi elegana tei satok pitok  khwlaimani tei nini ani hinlaimani hai raida chayano norwi khibinani tei naselemungrogno khibiwi bebaknono chini hwnwi wansugwi tongnani kokno  bo bini o koklobo swrai swraikhe sanani naio.

Q1. “ O sal buphuru phaino hwnwi ang nasingwi tongkha”- O kokbwtang boroni tei swinai sabo? Swinanini sinimung swidi? Swinai bo salno nasingwi tong sukurubwi swidi?

Phirokmung : 

Sakani o kokbwtang koklopnai kwrwng Kumud Ranjan Debbarma bai swijak “Nasingma” koklopni naharjakha.

Kumud Ranjan Debbarmani sinimung :-

Koklopnai kwrwng Kumud Ranjan Debbarmani sinimungno rwgwi sana thangkhe puilaono chwng bini achai salno rwgwi nailaiyanw aboni ulo bo bwswk jora porikha, bo jorarogni simi swimungo yak rikha tei bobo bedego sebuk khwlai tei bini mung gwnang bijaprogno je mansak silaiyanw. Swikwrwngni sinimungno khamao swbai swi phunukjakha.

Achaima thai tei salmari :-

Swikwrwng Kumud Ranjan Debbarma 1923 (Rachichuku nwichitham) bisini February talni 5(ba) salmario Agulini Krishna Nagaro achaio.

Kumud Ranjan Debbarmani rwngmari :-

Koklop kwrwng Kumud Ranjan Debbarma swrwngmungno rwgwi naina thangkhe bo Udaipurni Kirit Bikram Institution o matric eba Madhyamik jora porikha. Kok wngkha rwng remchi pass khwlai Madhyamik amjokmung rikha. Aboni yagulo jora kaisao bo Pochimbangani (Kolkata) Shantiniketon o bisa tongwikha. Ulo aroni kiphilwi Kumud Ranjan Debbarma phwrwngnaini samungo habo.

Borom rijakmani salmari :-

1974 bisio eba rachichuku snichibrwi bisio Agulio jugalijak ‘Bongo Sahithya Sommelon’ (বঙ্গ সাহিত্য সম্মেলন) o swikwrwng kokthai lop kwrwngno borom rijago eba swikwrwng Kumud Ranjan Debbarmano borom yapharjago. Jora kaisao bo thwngkwrwng (রাজনীতি) bai gwdaljak tongmani tai Aguli panchayetni pradan eba twiphang tongmani.

Swimungni sinimung :-

Swikwrwng Kumud Ranjan Debbarma Kokborok bai swithani jeswk yak kumunni mari tongo aswkno kokwanjwi bai swithani bo yak kubuk tei elem gwnang borok.Bini swijak bijaprogni bisingo khursathai kwlaio “Hachuk Rungma” 1995 bisio karijago. “Yakhwrai” 1996 bisio karijago. 1981 bisini 16 July  talni kokborok kokrwbai ‘yapri’ kokrwbai bwlaio bo kokbwkhal thaisa swikha “Komred Hemantano Muitu Khwlai”. Swikwrwng Kumud Ranjan Debbarma kwbangma koklop tei dal bidal swimung swiwi bini sinimung pirkha abo jotono kokborok kokrwbaini maikhul hinwi romwi nahar mano. 

Sakani swngmungno sukurubmung :-

Swinai bini o swima koklopni bisingtwi sana naimakhe haise, jephuru nwng ang nini-ani, nwng-ang hinlaiyawi tongmung sitwra tongmarog tongwlak. Walai-suklai kwrwikhe khoroksa tei khoroksano naseleyawi elegana khwlaiyawi chuknai borokrog chukyarogno chubanai, borok bai borok kha thansakhe tong kwchang tonglaimani kokrogno nasing tongo hwnwi swinai bo bini o koklobo sao.

Nwng-ang, nini-ani, tongthaini hani ari, bosong kotor bosong chikon, songduk kwrwi-gwnang wnglaimarog wngkha walai-suklai, bulai-toklai, naselemung tei kwthalaiya marini kokyaphang.Swinai tong sitwra achaimanino sokomolna muchungjago, bo jotobaino kwthalaiwi kha thansakhe tongnani kokno nasingnani bagwi sajao. Aboni bagwino bo bini bwkhani kokno kokthai riwi kuthuk wansukmungni bisingtwi wansugwi nwng-ang, nini-ani hwnwi walaimungrogno norwi tong kaham tongnani, borok bai borok kwchang kwchangkhe kwthalaiwi bosong kotor tei songduk hwnwi wansuklaimano sokomolwi jaiti duk songduk thansakhe tonglainani salno nasingjao hwnwi waire wai sajao. Tongthai ari deshni arino komol rinani, gwnangrog kwrwirogno satogwlak, kusupgwlak, gwnangrog kwrwirogno chubanai tei chukya borokno baksakhe tisanani bagwi saktharnani koknobo koklopnai nasingwi tongo hwnwi sakha.  Je borok manthai manya borogni joto manthaino manani nangnai, abohaikhese dophao tei hao stok-pitok, walaimung, naselemung tei sejamung kwrwi wngnai. Kumud Ranjan Debbarma abotwi salni bagwi naising tongma chwng bini “Nasingma” koklobo swijak sakani o kokbwtangni bisingtwi kahamkhe sai mankha.

Swinaisa bini o koklobo hani tong kesep,tongmung sitwra, bosong kotor, bosong chikon hwnwi kebono kebo borom riya, rwngmari gwnangrog rwngmari kwrwi borokrogno je mantwi satok-pitok khwlaimarigno nornani kokno tisakha. Bo teibo sakha ‘Khetni ail deshni ari swbai kaisa wngnai’. O kok samanino hai jora kaisao chuknai chukya kwrwi gwnang hwnwi sejalaigwlak, kaisa tei kaisano nisura khwlaigwlak, ani manthai nini manthai hwnwi seklaigwlak, rwngmari gwnangrogbo rwngmari kwrwirogno khoraiwi borogbai baksa kuchugo tisanai, aphuru keboni kha sitwra tongwlak hwnwi swinai sanani naikha. Kok kisa bai sana thangkhe sana kwlaio borokrog tongmung hamyano khibiwi borokrog tongmung kahamno yachaklainai, o salno eba o sal kahamni salno swinai salsa kubui wngnai hwnwi kha logwi nasingwi tongo hwnwi bo bini koklopni bisingtwi khuk perwi sao.

Follow khaidi👇