NANDA KUMAR DEBBARMA
Khoroksa kerongphang (lawyer) kaijakmani kwtal, nukhung khamabo kwtal, belai tongthok-chathok khe chwngsawi tongmani jora. Buini thani sanna nangmani kwrwi. Luku bosongo mung pirjagwi phaimani jora. Bihik bo English o M.A. pass khwlai phwrwngnaijwk wngnani imang nugwi tongmani joraono ma khijagwi bwsaini nogono tongo. Borogni nogo Dinang hwnwi khoroksa samung tangnai tongo. A Samung tangnai Dinangni chwrai khoroksa belai kok kwrwng. Sujatani bwsai samungo thangkhe a Dinang baino jatrepodni kok sawi tonglaio. Dinangni kok hwnkhe sapung –hopung khwnaoi khwnabaiya.
Salsa, sanja jorao, kerongphang nogo kiphilwi phawi achukthai nogo achugwi bihik Sujata tai Dinang bai kok salai tongo. Dinang bo thaisa thuisu Ingraji sanani rwngkha. Abono twwi mwnwilai tonglaio. A jorao Sujatani bumarijwk, kaijagwi Hongkongo tongwinai tai bwsai Engineer bo phaikha. Malaiya baluk kha hwnwi mare-marai tai kiching song puila malaimani belai khe tongthoklaikha. Haikhe kok sai tongthoklai tongte tongte ulo Sujatani mare sakha – Himdi mare, kisa shoppingrog khwlaiyanw, kiching bo himdi ta? Ukil sakha – Ang le thangwi mangwlak mare kiching. Iko norok thanglaidi. Hwnkhe mareno twlangnai do? Abo da swngnani kok, thangdi. Tamo tamo painani tong pai phaidi. Ang se jora kwrwi, wisaphano twlangwi manya nini mareno. Kaijakmani Honey moon sudu ma thangyakhu. Hwnkhe kiching chini Hong Kongo phaidi – Kiching kwtal sao.
Sujata dora dukhu khe khatiwi tiyar wngo. Borok nongkhorw thanglaiyo. Ukil saichung nogo himgurung tongkhe Sujatani almari ganao thangwi nugo twmabo kagoj chopsa kwlaijak. Tamo jani hwnwi khochawi berai rwnw hwnwi naiphurukhe nukha abo koktun bwlai se chabjak. Saobni hwnwi naimale aro swijak – SUJATA, ang nono bahaikhe pogwi mannai? Hamjaklaimani koktun (Latters). Kangsa kangsakhe philwi naimale abohai kokmang swijak. A jora phataro watwi phaimani has tai nokha bo gurumwi rwkha. Ukil Dinagno ringwi–tailamrog soi rwdi tai nwngbo mairog chawi nogo habwi thuwi tongdi. Ani samung kwbangma, nwng ganao tongkhe khwlai mangwlak.
Ukil kha kakha – o bwrwi ang bai aswk kahamkhe tongtwtwi bahaikhe tai khoroksa chwla bai gwdalwi tong! Omo hai bwrwi bai bahaikhe tongwi phainai salrogno lainai, bahaikhe bobai nukhung khawi tongnai. Nokni yang waisa ayang waisa himgurungwibo bwkha kwchangrwi manliya, Dundorogwi tongkha.
Swrapsa tongkhe Sujata kiphilwi phaikha, Yago kwbangma paimani manwirog pailaya. Sujata sao Maresong bai da shopping khwlainani thang thang Haiyakhe hai – kok banglaimang lengsuk kha. Yangbo watwi wawi harepek mang. Kok sana sabaiya wngwi tongtwtwi bwsai siring siring wngwi tongmano nugwi swngkha –Tamo wngkha sa? tamo kok saya siring siring. Bwsaini mwkhang kosom nugwi swngkha– Tamo swrapsa nogo saichung ma tongmada joli ? Ang ba nono swngwino thangbwla sa? Iko naigwradi, ang nini banta painjama kangsa tubukha, do chumwi naila, fit da wng ? Hai, Dinang biyang thangkha sa ? Dinang thuwi tongkha –Ukil sao. Angno dagiwi rohoro, gana tongkhe belai kok sao. Nwngbo haino mai chawi thuwi tongwidi. Ani khwna case kaisa belai important, tamo wngna tong sawi manya. Ano disturb ta khwlaidi. Haikhe kwbangma kok salaimani ulo Sujata mai chayawino sofa rokoi tongkhe muktwrwi thangkha. Hor bo kuthuk, ukil bihik thuwi tongmano naikha tai kotok sebwi bwtharwi khibikha.
Taini salo mare phaikha tai kiching no sakha – Kiching, chwng khwna Hong Kongo kiphilwi thangsinai. Kok thaisa tongmani, bahaikhe sanai pal manya wngwi tongkha, mare bo kwrwikha hwnkhe ba? Tamo kok , anono sadi mare – Ukil sakha. Mare kok philo – Mareni thani ani love letters tongmani. Angto ani boy friend bai ma kaijakliya. Aphuru mareno kisa tisai tondi hwnwi rwmani. Aboto ani hik Sujatano swijak se bwla mare – Ukil swngkha. Ani mung bo Sujatano kiching. Kerongphang twrwksakhe koktun bochob karioi yapharwi rwkha.
Aphuruni simi ukil baithangni yak rawi thwi kariwi rohoro. Haikhe kisa bwkha kwchang wngjago. Kwsa rankhe haino hai raphiro. Ulo khe yak rawi bo bini bwkhano methebwi manliya. Bo bini kiching khoroksa doctorni thani thango tai arono bithi chawi thwio.
Paikha
Wow belai interesting wngkha
ReplyDelete