Sudhanwa Debbarma bini o 'Hachuk khurio (1987) kothomayungo borok dopha eba luku bosongni langma kwtal jorani nobar sipsa hormani kothomano phunukani naikha. Borok daphani langma kwtal jorao yapri barokmani jora. O jora wngkha bubagwrani mol paiwi luku raidani mol chengsamani jora. O jora o huk khwlai chanai luku bosong eba borok dopharog hukno yakarwi kheto panthoro ongkhormani jora. 'Hachuk Khurio-1 kothomayungno rwgwi naikhe o joraono borok dophani langmao buini kok, buini hukumu tei buini tongmung chamungrog haphaimani nukjago. Hachuk Khurio-1 kothomayungo kwtal jora haphaimani logi-logino borok dopha eba luku bosongni langma bo swlaijakmani nukjago. Tripura hasteo Jonoshikha Somitini (1945) boyar sibsama bai hachuk kami amchairogo rwngni pohor nanghormani nukjakha. Rwngni pohorno manwi a jorao hachuk kami amchaio tongnai kwbangma borokrogni wansukmungo swilaijakmani marirogbo nukjago. Abono karwibo Hachuk Khurio kothomayungo Aguli amchaio tongnai tei kami amchai tongnai borokrogni bisingo tongthani chathani tei wansukthani pherlaimarogno swinai swrai swrai khe phunugwi rikha.
Hachuk Khurio -I 'kothomayungo kwtal jora sokphaimani eba haphaimani bisingtwi Mwtai Dongor kamini kwbangma hukbar khwlai chanai borokrogni wansukmung tei khakamungrogbo swlaijakmani nukjago. Mwtai Dongor kamini hukbar khwlai chanai Bodhraini wansukmungobo swlaijakmani mangpili nukjakha. Bodhrai khoroksa lekha pora rwngya hukba khwlai chanai borok phano bwsla Narenno pori rwna bagwi satungno satung hinyawi watwino watwi hinyawi lenglama kwrwikhe samung humung tangjao. Bihik Podmabotibo nukhungno thamuknani belaikhe kwrwng hwnwi mano. Bwsla Narenno borok swnamna bagwi eba Narenno pori rina bagwi buma bupha wngwi borogni khwlaithai tongmani eba chaitokmung tongmani nukjakha. Buma buphani o tongmung chamung tei wansukmung kaham wngma baino bwsla Narenbo pori thani thinangni kokno wansuknai wngwi mano. Bodhrai tei Podmabotini imang bwsla Naren Pass khwlaiwi, sebuk kotor khwlaiwi ulo hakim magistrate wnganw hwnwi tei borok kotorni bwsajwk bai kaijagwnw hwnwi.
Kothomayungo swikwrwng Sudhanwa Debbarma Narenni thwnggwrwngni bisingtwi borok dopha eba luku bosongni sichamungi lam phunukkha. O kothomayungo Naren kamini rwngnogo swrwngmani yagulo Agulini Umakanta rwngrogo porinani sep manma bai Agulio ma tongnani nangkha, Naren puila thongthai manya wngwi Agulini Gupen Thakurni nogo tongwi porikha. Naren Gopen Thakurni nogo tongwi Aguli amchaio tongnai borokrogni tongmung chamung tei khakamung wansukmungrogni kokno sai mankha tei Aguli amchaio tongnai borokrogni tongmung chamungbai kami amchaio tongnai borokrogni tongmung chamung bwswk joratwi pherlai abono o kothomayungo mangpili tisawi phunukha.
Hachuk khurio- (1987) kothomayungo Naren khoroksa kami amchaini hukba khwlai chanai nukhungni bwsa wngphano bini wansukmungno naharwi naikhe belai khe kuthuk wansuknai hwnwi sawi mano. Tamoni hinkhe Narerni thwnggwrwngno cherwi naikhe bini bisingo hoda-dophani hamkhwlai khwlainani, hoda-dophano kuchugo tisanani bagwi wansukmung kuplung baikhe yak tolwi lama phunuknai hwnwi sawi mano. Hachuk Khurio-1 Kothomayungo Naren khoroksa hoda dophano yak tolnai. Hodao mwnak puito kobolmarogno pohorni chwngmari bai hunai tei hamkhwlaini lamao busu wngwi bachai tongmarogno rwngmarini phan baikhe nornai. Naren wngkha hoda dophani thinangni chati. O chatini pohor wngkha thwiphwlaiya. Hachuk Khurio-l kothomayungo chatini pohor baino lukubosongni tongmung chamung khakamung wansukmungo swlajakmani mangpili nukjago. Hachuk Khurio kothomayungni kok bothomano cherwi naikhe swinai bini o kothomayungni bisingtwi khoroksa kuthuk wansuknai borokni naharmungno swrai swraikhe phunugwi rikha. Hoda dophano rwngni pohor bai chwngsasa khwlai tisanani tei swkang jorao hoda raidao mwnak puito kobol tongmarogno hui khibinani tei hoda dophano kuchuk yakhilik dumsanani kokno swinai bini o kothomayungni bisingo tisai phunukkha.
Follow khaidi⬇
Follow khaidi⬇
Sir. Bongsi Thakur ni sinimung swimung tai naharmung kaisa rwdi..
ReplyDeleteAnswer
DeleteSir tai b ridi
ReplyDeleteSir thwngnuk ni laibuma no ridi
ReplyDeleteHambai
DeleteSir Rung ni tei krwi dy
ReplyDelete