MONOLOGUE

Monologue : Monologue kokthai Greek kokni naharjakkha. ‘Monos’ – ni kokmang wngkha – “saichung”(alone) , tei ‘logos’ – ni kokmang wngkha – “kok sama”(speech) . Hake monologue wngkha khoroksa borok tei khoroksa bai eba lukuni bwskango kok samani eba dialogue. Kok saphuru bini rwngma, sima eba nangkukma kok sajaknairogno tei bini wansukmarogno sakmangbai tei khukbaikhe khorang khwlaiwi phunugo ebasajago.

Monologueni mangpili eba tongmari chwng kokrwbai, thungnuk, toke, pandarogo nugwi mano. Kokrwbaio khoroksa swinai bini wansukmarogno bini swimungrogni bisingo khursai sao. Thungnuk eba toke rogo khoroksa thwngwrwng bai tei khoroksa thwngwrwngni bisingo koklam salaimani abono monologue. Kok salai phuru janija sathai kok bothomano khursaui salaijago, nangmani bara kok alaida khe sajakmani nukjakya.

Monologue dalnwi tongo :

1. Interior Monologue

2. Dramatic monologue

Interior monologue:

Interior Monologue wngkha khoroksa thwngwrwng(character) baithangni wansukmung tei rwngmung - simungrogno nainairogni bwskango (audience) phunugo eba saui khwnario. Lukurog eba nainairog abono nugwi eba khwnaui swrwngmung kaham eba tongkosong tongmarino swrwngwi mano tei wansukmung mano. Baithangni khao kok samani, wansukmani, simani eba rwngmani abo hai nangkukmani kokrogno romwi lukurogno sicharina bagwi chaitokjago monologueni bisingtwi. Kokrwbaini dalbidal bedekni bisingtwibo monologueebabaithangnisajaknaikokrogsakwlaimanimariebalamanukjago.

Phunukmari:–

Koklop

Naisingma – Kumud Ranjan Debbarma

“O sal buphuru phaino hinwi Ang naisingwi tongkha,

Jephuru “nwng-ang” hinlaiwi,

“nini-ani” hinwi walaiwi, Tongmung sitra wngmarog Tei tong gwlakkha.”

Dramatic monologue:–

Dramatic monologue wngkha khoroksa thwngnai(character) tei khoroksa eba khoroknwini swlai kwbang thwngwrwng thwngnai(character) bai kok salaimani. Kaisa thungnugo eba tokeo khoroksa thwngnaini je sathai eba khwlaithairogno jotono khwlaio raida romwi eba dagijakma haikhe khwlaio. Khoroksa borokni rwngma simarogno, wansukmungrogno lukuni bwskango phunukna bagwi khoroksa characterbai tei khoroksa characterni bisingo koklam salaimani bisingtwi wansuk rijago. Nangmani kok simi masao, nangya kokrog sajakya dramatic monologue o. Jorano bujiui waisa uisu nangya kokrogbo khursajago, haiphano aswk khursajakmani nukya. Abo haikhe lukurogni bwskango saui khwnarijago eba phunukjago. Dramatic monologue thungnuk eba tokeno karwibo kokrwbaini dalbidal beremo swimungni bisingtwi swinai baithangni wansukmungrogno khoroksa character bai tei khoroksa eba khoroksani swlai kwbang characterni koklamni bisingtwi kok bothomano sukrubui sanani chaitokmani nukjago.

Phunukmari:– Koklop

Kubui phano khwnathokya

– Kumud Ranjan Debbarma

“Takhuk bising tongwi monai

Chao mairogsarwi.

Tola Tokma bwsa gwnang Sao cha twtwierwi,

“buini ajima ba, saknangya.

Ang haiya, buini chaya,

Chao sak tangwi.”