Chini Hukumu chini mukumu

দামরা : 

দামরা অৗংখা চিনি বরক দফানি কাইসা সামুঙ তাঙজাকনাই মানৗই ৷ অ মানৗই বাই চৗঙ মাই কাইফুরু, হাকর খুরফুরু, তকখি আকরগ রকফুরু সামুঙগ অ মানৗইন’ থেপাজাগ’ ৷ চিনি বরক দফানি বরকরগ আগি চিনি দঙগইমা দঙগইফা সঙনি জরারগ অ দামরাবাই থাঙগৗই তঙনা বাগৗই হুক চাফুরু ব’ দামরানি য়াকুমুনি মারি বেলাইন’ মুলাজা গৗনাঙ অৗঙগৗই তঙগ’ ৷ অ দামরান’ আগিঅ বরকরগ দা বরক হাময়া অৗঙ থাঙখে আ হাময়া দা বরক কচ’ ন’ তাইসা বুফাঙনি বুফুঙ সৗনামৗই বুফুঙ দাউই দামরা সৗনামৗই নাঅ ৷ অ দামরা আসৗক দা বরক কাহাই কুবুকয়া ফিয়া হাকররগখে কাহামখাইন’ চগৗই মান’ ৷ জরা ফের’ তাবুক বরকরগ তখৗলাই ফাইতে ফাইতে অ দামরা মানৗইন’ মুইতুন’ পগৗই থাঙবাইখা ৷ তাবুকখে বরকরগ ছাপল হৗনৗই মানৗইন’ সে সামুঙগ ফৗনাঙসিঅ ৷ অর’ কাইসা কক সাথাই কৗলায়’ দামরা বাই জেসৗক সামুঙ তাঙজাগ’ তেই হাকর খুরজাগ’ আসৗকন’ কুবুক আৗঙগ’ ৷

গারিঙ :

গারিঙ অৗঙখা চিনি বরক দফারগনি হুক তাঙগৗই চাফুরু লেঙলাজাকনাই কাইসা উা বাই সৗনামজাক নক ৷ অ গারিঙ নক আসৗকখে নাইথথ্ক হুকনি হাপারবাই নবার নাঙসর’ সর’ অৗঙগৗই তঙথথক অৗঙগৗই তঙগ ৷ অ গারিঙবাই চৗঙ কৗসৗঙ কৗসৗঙনি হালক কৗচাম, হুক খৗলাইফুরু চৗঙ গারিঙ নক তাঙমানি অৗঙখা জরা জরাঅ নবার উাতৗই কাতিনা বাগৗই হুকনি থায়অন’ চিকনসাখে তাঙজাগ’ য়াখেবা বাকসা বাকসা বরকরগ করতখেব’ তাঙগৗই নাঅ ৷ 

সারিন্দা :

সারিন্দা অৗঙখা চিনি তিপরা বসঙনি কাইসা কৗচামকুক তামজাকনাই মানৗই ৷ অ মানৗইন’ চৗঙ বরক দফানি জাদু কলিজা রৗচাপমুঙ রৗচাপ ফুরু রগ’ তাম’ ৷ অ সারিন্দান’ সৗনামনা হৗনখে সেচু তেই চেথুউাঙ বুফাঙরগবাই সৗনামজাগ ৷ সারিন্দানি বুদুকন’ হিনখাই চিবুক হাম বাই সৗনাম জাগ’ এবা সাজাকমাতৗই তেই খৗনামাতৗই হিনখে  করাই খিতুঙবাইব’ সারিন্দা বুদুক সৗনামজাগ’ হৗনৗই সাবাইঅ ৷ তেই পুঙয়া অৗংগৗই তঙখে সারিন্দা বুদুগ’ মুন্দাই সিলৗই রিখাই তেইব’ কাহামখাই পুঙগ’ ৷  অ মুন্দাইন’ হিনখাই চৗঙ পিয়া বথপনি মান’ ৷ 

জাপা :

কৗদৗকমা বিসি লায়ৗই কাবুজাক জরারগ চিনি বরক দফানি বরকরগ বরগনি রাঙ-রি, মাথিয়া, সুরাং, গানথি, তাই রাঙবৗতাঙরগন’ তনিনা বাগৗই কাইসা উানি উাজাক খলপজাকনাই রিউই সৗনামজাকন’  হিন’ জাপা ৷ অ জাপারগ আগি চিনি আচাই সৗকাংসঙরগনি জরারগ সামুঙগ ফৗনাঙজাকফান’ তাবুকনি অ কৗতাল জরাঅ ফায়ৗই জাপান’ আসৗক বরকরগনি থানি নুকলিয়া, ফিয়া তাবুকব’ হাচুক কামি আমচাইনি মুলুকরগ’ নক নুখুঙ খাউই তঙনাইরগনি থানি তঙগৗই মান’ ৷ 

রাঙবৗতাং :

রাঙবৗতাং অৗংখা চিনি তিপরা দফানি কাইসা বৗরৗয়রগনি  কতকগ’  কানজাকনাই মানৗই ৷ অবন’ পুয়সা বেলেপবাই বৗতাঙ বৗতাঙখে সৗনামজাগ’ ৷ আগিরগ’ বৗরৗইরগনি কতকগ’ জাইখে নুকফান তাবুকখে আসৗক নুকলিয়ান’ হৗনৗই মান’ ৷ তামনি হিনমালে তাবুকনি অ কৗতাল জরাঅ চৗঙ কচকতে কচকতে চিনি হুকুমু মুকুমুন’ পগৗই থাঙরৗক থাঙরৗক অৗঙ তঙখা, আবনি বাগৗই চৗঙ চিনি সিনিমুঙ, চিনি হুকুমু মুকুমুন’ তাইব’ বৗসকাঙগ রচঙগৗই তৗলাঙগৗই থাঙনা চাইতকনা নাঙগ ৷ 

চেখক :

চেখক অৗংখা বরক বসঙনি কাইসা চাখৗই তলৗই চাজাকনাই মানৗয়, অব’ কাইসা খিতুঙ কৗপলা খাইয়ৗই  উাবাই উাউই সৗনামজাক ৷ জরা জরাঅ আগিঅ চিনি  বরকরগ  মায়মুই সঙমা থাপানি থাপলাবাই চেখকগ’ রিউই চাখৗই তলৗই চাখৗই চাউই ফাইলাইঅ ৷  

দাংদু :

দাংদু অৗংখা বুখুকনি নবার বাই তামজাকনাই কাইসা মানৗই ৷ অব আগিঅ জাহাইন’ খৗনাঅ ফিয়া তাবুক খৗনালিয়া, তামনাইব’ কৗরৗইখা ৷ কক হৗনখাই হাই অ দাংদু কৗমানানিন’ নায়ৗই তঙখা, আবনি বাগৗই অবন’ তাবুক চৗঙ তামৗই, সৗরৗঙগৗই তাই খাতিউই নারাকথাই হৗনৗই খা খৗলায়’ ৷ অ দাংদুন’ বাকসা উা বাই তেই সর বাইব সৗনাম’ ৷ 

দিংরা :

আগি চিনি বরকরগ হুক খৗলাইলায়’ তাই মাইতাংরগ মুনখা হিনখে  রাউই মাইতাংন’ দিংরাঅ দাঅ ৷ দিংরা হৗনখে লাঙগা কাহাই, ফিয়া লাঙগা হাই আসৗক কুবুংখাই উাজাকয়া ৷ দিংরান’ খাই কিসা কেসেঙ কেসেঙখে উাঅ ৷ লাঙগানি সৗলাই তাই কিসা কতর ৷ 

চংপেরেঙ :

চংপেরেঙ অৗংখা কাইসা তামজাকনাই মানৗই, অব’ ব’ সারিন্দা হাইন’ ৷ সানা থাঙখে চংপেরেঙ গিতার কাহাই অৗংগৗই তঙগ ৷ অ চংপেরেঙরগন’ জাদু কলিজা রৗচাপমুঙ রৗচাপফুরুরগ’ তামজাগ’ ৷ অ তামমুঙব’ চিনি তিপরা বসঙনি কৗচামকুক তামজাকনাইনি বিসিঙগ কাইসা ৷ 

চন্দ্রহার :

চন্দ্রাহার অৗংখা কাইসা কতকগ’ কানজাকনাই মানৗই, অব’ ব রাঙবৗতাং কাহাইন’ ৷ হাইফান’ অব’ রাঙবৗতাংনি সৗলাই তাইসা জিলিক জিলিক অৗংগৗই তঙগ ৷