Kokborok Kokrwbaio Doulat Ahmed

Khukmoson : Kokborok kokrwbaino songsawi kwlangnaini bisingo tei Kokborok kokrwbaino hamjaknaini bisingo Daulat Ahmmed bo khoroksa. Laibuma rwgwi naikhe bini mungrogno chwng khursajak mano, Aboni bagwi borog hai borokni mung nokhani athukiri kwchwng bokol haikhe tabukbo chwngsawi tongo tei tongnai Kokborok kokrwbaini rukungo.

✡ Doulat Ahmmedni siminung :

Swikwrwng Doulat Ahmmed achaikha 1274 Tripura bisi eba 1271 Bangla bisio. Bini achaima kami wngkha eba omthai thwi kwlaima kami wngkha Tripura hasteni Sonamura bwkhasteni Kulubari kamio. Buphani mung wngkha Mohammod Hasim Majumder. Kokborok kokno karwibo swikwrwng Doulat Ahmmed Parsi kogobo elemgwnang tongjamani. Bo tongthar rwkthar naikwrak eba naikolphangbo tongjamani. Abo haikheno bo bini langma jora lairwi rohorjakha. Doulat Ahmmedni bwsalni mung wngkha Nehar Uddin Ahmmed. 

✡ Doulat Ahmmedni Samung tangbwtang tei rwngmari :

Doulat Ahmmed Kumila jila rwngnokni entrance amjokmungo achukani swkang bo Haktor Bharatno Ingrejrogni yakni phiyoknani chobao ongkhorjakha, aboni bagwi bono aphuru rwngnokni rwkhwlaiwi rohorjakha. Aphuru bini umor bisi nwichi. Aboni ulo bo rwngnokni phwrwngmungo yapharjakha. Bini umor bisi nwichisa phuru Sonamura minor rwngnogo bono phwrwngnai okra-yakchuni barja yapharjakha. Aboni bisibrwini ulo Tripura hasteni kerong amjokmungo pas wngwi Sonamurani kerongnogo kerong phwrwngni samungo hapkha. Abohaikheno bono ulo bini umor thamchidok phuruo koklopnai tai swikwrwng hwnwi Lucknow-ni ''Jomiutul Umela''-ni M.M Dahar swrwng bwlai manjakha. Aboni ulo bo ''Bonggiyo Sahitya Porisod'' bai ''Kavyabinud'' tei ''Sahityaratna'' swrwngbwlai yapharjakha.

✡ Doulat Ahmmedni swimung :

Doulat Ahmmed thuruksa bosongni borok phano bo Kokborokno hamjagwi swimungrog swina chaitogo. Bobai swijak kokborok bijapno puila kokborok kokrwbaini puila kokma bijap hwnwi sinijagwi tongo. A kokborok kokma bijapni mung wngkha "Kokborma ong Tripura Byakaran" Sapogwi karijakma bisi wngkha 1897/98 bisio. Aboni bagwi bini mung kokborok kokrwbaini laibumao joto jorani bagwi muitu narakjagwi tongnai. O bijap swithani tai khoroksani mungbo khursathai kwlaio tangwi hinkhe borog kwnwini mungno o bijap swithani yak tongo. Bini mung wngkha Mohammod Umor. Abono karwi tai kangsa kokborok kokma bijap 'Kokma kalai' mungwi kangsa bijap swikha. Doulat Ahmmed koklok tai koklop khobwi kang nwichibrwi/ nwichiba (24/25) swk bijap swilangkha.

✡ Doulat Ahmmedni Bangla swimungrog:

Bini puila koklop bijapni mung wngkha '' কুসুম মঞ্জুরী" obo 1292 Bangla bisio sapogwi karijago. Aboni ulo ''জীবন মঙ্গল কাব্য" (1311 Bangla bisi), "শোঁকগাথা" (1315 Bangla bisi), "রাজ-উৎসব" (1319 Bangla bisi), "কুন্দকলি" (1324 Bangla bisi) sapogwi karijakha. Oborog joto bini Bangla kokni swimungrog. Oborogno karwi teibo Bangla kogo bini swimungrog tongo oro khursajakliya.

✡ Doulat Ahmmedni Kokborok swimungrog:

Kokborma Ong Tripura Byakaran - 1897/98

Kokma Kalai - 2007 bisio ulo sapogwi kario. Hachukni Publisher.

Khatungsano - Kokborokni puila koklop

Bolong, Hati, Nokha mungwi o kaitham koklop (Kokoma kalai bijapni paithak bwkhak swijak tongo).

✡ Doulat Ahmmedni wansukmung :

Swikwrwng Doulat Ahmmedni wansukmungno naina thangkhe bo khoroksa kokrwbai, tongthar tei jatre-pod rwngdalno twiwi wansuknai. Bini wansukma hinkhe kok mankhe khani kokno swrai swraikhe sawi mano khoroksa tei khoroksano aboni bagwino bo Kokma Kalai bijabo Bangla kokmang riwi kokbwtang, kokthai akorog riwi swio. Kok hinkhe kokborok manya wanjwirogno bujirinani bagwi. (Norog teibo kahamkhe swidi)