Swikwrwng Sunil Debbarmabai swijak ‘Langmani Rukungo’ kothomayungo chwng Sumoti hwnwi khoroksa bwrwi borokni tonggwrwngno mano. O kothomayungo Sumotini nukhungni kaham hamya jwngjalni kokrognono kothoma rwgwi swijakha. Bini nukhungo Buma bupha, buphayung tei hanok kwnwino twiwino borogni nukhung. Phiyaba achomsa bupha mwtai chalangmani yagulo bwsajwk okra wngwi Sumoti bini nukhungni pojano ma horkha. A poja twina nangma bagwino sumotini wansukmung, muchungmung tei khakamungrog kwmawi thangbaio. Tamoni hinba nok nukhungni pojano horte horte bo bini muchungmarogno pogwi thangbaio. Chwng jotono sio birmno kwlaikha hinkhe borokrog twio kwlwk kuphung wngma hai wngo. Haikheno Sumotini langmanobo jora kaisa birmani pojano twiwi naikolwi ma tongkha kwlwk kuphung wngwi. Jora kaisa bobo pora lekha swrwngwi kuchuk kolok kotor wngwi borokbai sinijaknani eba buibai kaham hinjakna muchungmani, phiyaba abo jotono oroi-poroi wngwi thangbaio. Nobar kotor phaiwi nok huk buphang waphang swbaitwi jotono kobonwi uriwi twlangmatwi bini a imangrogbo nokbarbai baksa birmanni kundulo kwlaiwi uriwi thangbaikha. Abotwikhe twrwk twrwk nok nukhungni barja eba samungbai twi dulte dulte bini langmao kwbangma birmani kothomarogbo sawi mano.
Sumotini Tonggwrwng/Thwnggwrwng:
Sumotini tonggwrwngno rwgwi naikhe bo belaikhe kha kolok tei wansukna kwrwng bwrwi. Buphayung tei bahanoksong jora rwgwi bibi Sumotino twiwi wansukya phano Sumoti borogno twiwi belaikheno wansugo. Bini wansukmung wngkha bo kaijagwi thangkhe - Buma, buphayung tei bahanoksong sak saichung bachathanio lama koronai tei tong kesep wngwi phainai hinwi bini wansukmung. Aboni bagwino bo sakni hamjakmungno kotono toniwi jorani dwkhwino sotonwi, kha bisingo sakni muchungma eba khwlaina muchungma kokno hui huiwi kha kolok tei nukhung hamkwraini phaising wansugwi yapiri seo. Sumotini bwskango samung kwbangma tongo buphayung bahanoksongno pori riwi kolok kotorkhe tisanani nanganw abono bini kaisa imang. Sumoti wansugo bo tumungno kaijagwi thangkha hinkhe bini nok nukhungni borokrogno kahamkhe naikolwi twlangnai borok tongwlak hinwi.
Sumotinibo nukhung khawi bwsa bwtwi wngwi tongnani imang tongo haiphano bahanoksong kha siya jora rwgwi bibino twiwi wansukyabai sumoti hai khoroksa kha kosong kubuibai tongnai bwrwi, kha loksugwi hamkwraini bagwi samung khwlai tongmani mangpilirogno o kothomayungo swrai swraikhe phunukjakha. O kothomayungo sumoti khoroksa bwrwi wngwi binibo hamjakma tongo Badrai mungwi khoroksa chwlano. Tangwi hinkhe bini langmano songsawi chwnariwi naithokthok khwlai rinai wngkha Badrai. Haiphano hagwino sumoti bini hamjakma, wansukma, muchungma akorog norwi nok nukhung barjano kotorkhe nukha. Oro sathai kwlaio sumoti wngkha khoroksa hodani bagwi tei nukkhungni bagwi wansukmabo chwng o kothomayungo nukha.
Sumoti wngkha khoroksa bwrwi. Khoroksa ma phani sajwk wngwi bini khwlaithai bo jora khwlai phunukjakha. Sumoti belai kha kolok sak soinai tei aboni logi logi kha kwrak. Sana thangkhe khoroksa bwrwi wngwi bini samungrogno sursawi naikhe belaikhe wanamasingsa hinwi mano. Khoroksa bwrwi wngwi bini saktharmung tongmani bagwino Bwrwi swrwng tei hamkwrai motho mungwi kaisa swnamkha haiyakheba achuk riwi mankha. Aro buma bupha kwrwi bigra khagra nukhungni bwrwi bwsarogno twiwi phwrwngjago. Sumotibai naikoljak a mothao rangthongo baithang yakungbai bachai mannani tei ri supnani abotwirog phwrwngjago. Abono karwibo Madhyamik Drop out wngjak kwrwi nukhungni bwrwirogno toniwibo bini a mothao kahamkhe phwrwngjago. Aboni bagwino o kothomayungo Sumotini tonggwrwng tei wansukmung belaikhe kuthuk tei judakhe nukjago. Bo khoroksa kwrwi nukhungni borok, haiphano bo hoda dophani samung kahamni bagwi bo o samungni bwtangrog romkha.
Khoroksa bwrwi wngwi tongna chana biyal phaisa chakhe phatiknwi chaya abo haikhe jora kaisa tongmani. Sumoti hai kha sinai tei jora rwgwi wansuknai wngmabaino bini nukhung twrwk twrwk chwnamani mangpilirog chwng nukha. Bo bini nukhungo hanok khoroknwi tei buphayung khoroksano rwng phwrwngnani tei chuk riwi rina bagwi belaikheno sak tharo tei wansugo. Sana thangkhe khoroksa bwrwi wngwi hanok tei phayungsongno naikolnani sakni swlai phano hamjakmung riwi bini kha kuwarbai langmani chobao yapri seo.
Sumotibo sak baithang bo rwngswrwngmung swrwngna muchungjakmani, phiyaba rwngremchi jora poriwi tongphuruno bini bupha thwi thangjakha. Sumotini wansukmung wngkha sak baithang kuchuk beremni swrwngmung swrwngwi manliya phano buphayung, bahanoksongno langmani pohoro twlangwi borok swnamnani muchungjago. Sumotini tonggwrwngni bisingtwi chwng nugo bo baithangni bagwi wansukyawi luku hodani bwskango buphayung tei bahanoksongno rwngmari gwnang rang ri gwnang khwlaiwi kwlangna muchungjago. Tamoni hinba bo baithang birmanni duwaro kwlai bwswk kotor poja horna nangkha abo kahamkheno sawi mano.
Comments
Post a Comment