TANGHALOK(CASE)

Kokbwtango mung eba mungswlai bai khwlai kokthaini halok bojakhe abono hino Tanghalok. Phunukmari: Boyar lamao solani ri kwtal kariwi yak baithang bigrarogno bagwi tongo.

O phunukmarino naharwi naikhe khwlai kokthai wngkha'bagwi tongo', kok hinkhe oro tangphang(Boyar) kaisa samung khwlai tong,abo wngkha bagwi tongmani. O bagwi tongmanino wngkha khwlai. Aboni bagwino sajago Kokbwtango mung eba mungswlai bai khwlai kokthaini halok bojakhe Tanghalok hinjago.

Phunukmarini kokbwtangno kwbangma swngmungni bisingtwi swngkhe kwbangma kokbakni halok kwrwngjak mano. Romdi:

Sabo bagwi tong? - Boyar

Tamo bagwi tong? - Ri

Tamobai bagwi tong? - Yak baithang

Sabono bagwi tong? - Bigrarogno

Boroni naharwi bagwi tong? - Solani

Boro tongtwtwi bagwi tong? - Lamao

O phunukmarino naiwi obono bujio o kokbwtangni 'bagwi tongo' khwlai kokthai bai kwbangma kokbwtango tongnai kokbak halokni kaisa kaisa mung tongo, o halokni bisingtwi jeswk mung swnamjakmani aswkno Tanghalokni dalbo.

Tanghalokno kokborok kogo daldok khaiwi khagwi mano:

1. Tangphang Tanghalok

2. Tangjaknai Tanghalok

3. Tangmanwi Tanghalok

4. Tangmuk Tanghalok

5. Tangyakchu Tanghalok

6. Tangnikuma Tanghalok

 

1. Tangphang Tanghalok

Khwlai bai tangphang kwrwnglaijak kokbakno hino Tangphang Tanghalok.

Phunukmari: Pirsati khum kholo.

 

O phunukmario tangphang wngkha Pirsati. Muitu narakthai Tangphang Tanghalok sinina thangkhe (Sabo) hwnwi swngwi phirokmung manmano wngkha Tangphang. Abohai kheno sakani o phunukmarino swngwi mano - Sabo khum khol? Hinkhe phirokmung wngnai Pirsati.

2. Tangjaknai Tanghalok

Khwlai bai tangjaknai kwrwnglaijak kokbakno hino Tangjaknai Tanghalok.

Phunukmari: Banthu bol philo.

 

O phunukmario tangjaknai wngkha Bol. Muitu narakthai Tangjaknai Tanghalok sinina thangkhe (Tamo/Bomo) hwnwi swngwi phirokmung manmano wngkha Tangjaknai. Abohai kheno sakani o phunukmarino swngwi mano - Banthu tamo phil? Hinkhe phirokmung wngnai Bol.

3. Tangmanwi Tanghalok

Khwlai bai tangmanwi kwrwnglaijak kokbakno hino Tangmanwi Tanghalok.

Phunukmari: Khamwchang latha bai pun buo.

 

O phunukmario tangpmawi wngkha Latha. Muitu narakthai Tangphang Tanghalok sinina thangkhe (Tamobai/Sabobai) hwnwi swngwi phirokmung manmano wngkha Tangmanwi. Abohai kheno sakani o phunukmarino swngwi mano - Khamwchang tamo bai pun bu? Hinkhe phirokmung wngnai Latha.

4. Tangmuk Tanghalok

Khwlai bai tangmuk kwrwnglaijak kokbakno hino Tangmuk Tanghalok.

Phunukmari: Buphang buchukni bwthai kwlaio.

 

O phunumario tangmuk wngkha Buphang buchukni. Muitu narakthai Tangmuk Tanghalok sinina thangkhe (Boroni/Boroni simi) hwnwi swngwi phirokmung manmano wngkha Tangmuk. Abohai kheno sakani o phunukmarino swngwi mano - Boroni bwthai kwlai? Hinkhe phirokmung wngnai Buphang buchukni.

5. Tangyakchu Tanghalok

Khwlai bai tangyakchu kwrwnglaijak kokbakno hino Tangyakchu Tanghalok.

Phunukmari: Bigrano chamung ridi

 

O phunumario tangyakchu wngkha Bigra. Muitu narakthai Tangyakchu Tanghalok sinina thangkhe (Sabono) hwnwi swngwi phirokmung manmano wngkha Tangyakchu. Abohai kheno sakani o phunukmarino swngwi mano - Sabono chamung rinai? Hinkhe phirokmung wngnai Bigrano.

6. Tangnikuma Tanghalok

Khwlai bai tangnikuma kwrwnglaijak kokbakno hino Tangnikuma Tanghalok.

Phunukmari: Mwsa bolongo tongo

 

O phunumario tangnikuma wngkha Bolongo. Muitu narakthai Tangnikuma Tanghalok sinina thangkhe (Boro/Buphuru) hwnwi swngwi phirokmung manmano wngkha Tangnikuma. Abohai kheno sakani o phunukmarino swngwi mano - Mwsa boro tong? Hinkhe phirokmung wngnai Bolongo.

Oborokno karwibo chwng kokborogo tanghalokni marirokno teibo khagwi mano:

7. Genitive/Possessive Case*

Mung bai mungswlaino jephuru chwng baithang halokni mari phunukmanino hino Genitive Case.

Phunukmari: Bo ani ama/ Obo Ramni Swikong

 

O phunukmario naiwi naikhe kaisa baithangni halok mari nukjago. Oro hinkhe Saboni hwnwi swngwi phirokmung manmano hino Genitive Case eba hwnwi mano Halokrwk Tanghalok.

 

8. Comitative Case/ Tangbaksa Tanghalok*

Kokbakni bwtango tumung baksani mari phunukjakhe abono hino Tangbaksa Tanghalok. Phunukmari: Aichuk Khumpui bai hatio thango.

 

O phunukmario naiwi naikhe kaisa baksani mari nukjago.

9. Perlative Case*

Phunukmari: Khachuksa Agulio Jiraniatwi phaio.

 

O phunukmarino naiwi 'Biyangtwi' hwnwi swngmung swngwi phirokmung manmanono hino Perlative Case.

 Click Here👇 for PDF

Phirokmung