Sajwk (Kothoma bwsa)
Bikash Debbarma
Phung aisiri siri maisingni siyari tini haduk kolok kamino muthubwi khibima hai ma tongjago Saidwrai. Baithangni langmao Kebono naharwi nuhurya hai wngwi teibo kha thwijago. Aichugo kapangni hik sak hamya wngwi thwima bagwi siyarini pantwibai baksa mokolni mwktwi yorwi kwlaijago Saidwrai. Bwsajwk khoroksa susung kha khu siya wngwi kabwi lengtwi lengtwi, kamini Khoroknwi khoroktham bwrwirogse bokhorogo twi lulaiwi swrarisio. Haikheno o Salo Saidwrai bihikni kasto khaiwi lairikha muktwibai kungtwibai khai. Sarigo bupha bwsajwkno kabwi tongma nugui " ta kapdi matu, wngkha thaksidi" hwnwi bandino, Kamini borokrogbo sanja wngkhe jani jani nogo twrwk twrwk thangbaikha. Hainose borogni nukhungo tei kebo kwrwi haini bagwi teibo nilar wngjak kuthuk hor. Swibo swngma khorang, huchungo bo siyal hulukma khorangbai kha udila wngwi teibo bihikni kokno muitu manjago Saidwrai. Muitu manjago bihik langma chaya sini swkang bono " Ang thwiwi thangbo ma Laisa no kahamkhe pori rwdi " hwnwi salangmani kok. Haikheno Saidwrai twrwk twrwk mwnakni horo mwktwrwi bai chenwi kolobwi khibijago.
Abohaikhe tongte tongte nokha talbrwi laikha bwsajwk khoroksano twiwi. Bwsajwk Laisa tabuk remdogo porio, taise o jorao buma thwi thangjakhaba kamini borokrog khairokma singsa wngjakbaio tei mayarogbo khaibaio Laisano. Jephuru bumani maya nango a jorano bumabo thwi thangjakha, tabuk buma kwrwini bwsa laisano naikolnai kwrwi. Haini bagwino kamini borokrog bumani hamjakmung Laisano teisa rwna bagwi Saidwraino taisa kaijakna bagwi salaikha. Phiyaba Saidwrai bihikni hamjakmano pogwi manjakya uram uram bo bini bihikno muiturog manjak twrwngo. Tei babaisa bwkhak naisigwi naikhe kamini borokrog sama koknobo narakna muchungjago. Saidwrai wansukma kuthugo kwlwgwi wansugo bwsajwk laisabo chwraikho, buma thwimani ulni simi nok-nukhungni samung horna nangwi tongkha hwnwi wansukte wansukte Saidwraini khunjuo kaisa kok bujakphaio nini sajwkni tabuk porinani thwngnani jorasi, bayap mare kiching songbaibo gwdalwi tongna jorasi bono aswk samungo ta dasondi Saidwrai saidwrai...! hwnwi biyangni khorangbo Saidwraino salango.
Haikheno saidwrai kaijakha salsa. Laisani kwtal buma ni mung sukuntola. Saidwraini bwkhaobo tabuk mungsa muila nangjak kwrwi Laisano bumani hamjakmung teisa riwi mankha hwnwi. Sukuntolano bo Laisa buma hwnwino chongwi nasukha. Phiyaba Laisano Sukuntola kunu phurubo sajwk hwnwi gosiwi naya. Naite naite bisa laiwi thangkha tei Sukuntolanibo khoroksa bwsa bwrwi achaikha. Laisabo belaikheno tongthokjakha bini kukui bwsa achaio hwnwi . Sukuntola wansugo tumung bini bwsabai Laisa kaisa nogo tongwi tongkhe Laisani hamya tongmung swrwngnai hwnwi. Aphuruni simino Sukuntola hamya wansukmung bini khao tubuo. Satokna chengo,kwrak samung tholna chengo laisano. Yang bupha mungsa siya phung aikheno samungo thangkhe nogo tamo wngwi tong tamo wngya tong saimanya bini bai bo samungbai gwdaljak. Salsa sukuntola Gatio thangsini Laisa gantinok kunao maituk muituk huwi tongphuru bini kukui bwsano kabwi tongma khwnawi doro doro thangwi bamwio, aphuruno puila je achaimani talsani ulo ma bamo laisa bini kukui bwsano. Phiyaba sukuntola nukphaiwi phatsakhe laisani yakni segwi naharo. Tei hino 'morajwkma nono maituk muituk hudi hwnwi samada oro phaiwi cherai bamwi tongphai, kobor bwsa , ei rai hwnwi jaterepot natini-khutini kok sawi kudikha. Laisa belai khao dukho nangjagwi ganti nok kuna thangwi bumano muitu khaiwi kabo ' o ama ano naphaidi ano nwng saichung kwlangwi biyang thangkha. O ama-wi ano naphaijadi ' hwnwi mwktwi khikwlaiwi kapjao. Twrwk twrwk obohaikheno din sal laio tei Sukuntola bwsai Saidwraini thani kok tisao Laisano kaina bagwi. Phiya bupha Saidwrai gosiliya bwsajwkno kainani hwnwi, bo wansugo bini bwsajwkni tabukse thwngna- twina ni jora. Phiyaba paithago Saidwrai bihik sukuntolani thani chenna nangkha, bihikni kechen wngwi thangna nangkha.
Kaijakmani talsa talnwi Laisani langma kahamno tongmani. Phiya laisa chwraini bagwi,wansukma aswk phayakhuni bagwi bwkra bwkrajwksongni nukhung kahamkhe aswk naikani khaina rwngjaliya. Aboni bagwi Laisa kwbangma dukho birman jwngjalrog soiwi tongna nangkha. Twrwk twrwk bwkra bwkrajwksongni satokmungrog teibo Sal bareya bariwi phaio. Tokma twimase sal baro satokmani sal barliya. Homdino bwkwrajwk bai kuljao ' swkal Jwkma nwng lachiyada kaijak phurubo mungsa tubuya, nini sago kisa phano lachimung kwrwida, nwphani yakni 1 lakh rang nahardi phiya wngyakhe nono kwthang kwthang hor bai sogwi bwtharnai' hwnwi sikiri sokoro khaijao. O kok bo bini ama Sukuntolano sahorkha, phiya rang rohorna soiliya sukuntola. Haini bagwi rang ma rohorna kiriwi Sukuntola bwsai Saidwrainobo mungsa saliya.
Laisani bwkwrajwkbo khoroksa bumano bwle bahaikhe bo aswk satogwi mankha. Bo laisani logi je hamya khaimani tumung bini baithangni bwsajwkni logio wngkhe bo mada mankhamu bwsajwkni wngjak obohai patimungrogno khwnawi, soijo da khaimankhamu?
Phiyaba kubuino o Sal phaikha Laisano kwthang kwthang kerusin bulwi sogwi khibikha bini bwkwrajwk. Oboda swngsarni raida bono tei swlai manyade? Haini bagwino ang naio obohai satokmung kebo soiwi ta tongthun, oboni bagwi khorang tisathun.
Comments
Post a Comment